മെസ്സിയുടെ തലയുടെ പിന്നിലും കണ്ണുകളുണ്ടോ ? സംശയവുമായി ആരാധകർ |Lionel Messi

നിലവിൽ ലോക ഫുട്ബോളിൽ ലയണൽ മെസ്സിയോളം ആരാധകരെ ആനന്ദിപ്പിക്കുന്ന മറ്റൊരു താരം ഇല്ല എന്ന് പറയേണ്ടി വരും. മൈതാനത്ത് മെസ്സിയുടെ ഓരോ നീക്കങ്ങളും ആകാംഷയോടെ കണ്ടിരിക്കുക എന്നത് ആരാധകരെ സംബന്ധിച്ച് ആനന്ദകരമായ കാര്യമാണ്. കാലു കൊണ്ട് മാത്രമല്ല തലച്ചോറ് കൊണ്ട് കൂടി കളിക്കുന്ന താരമാണ് അർജന്റീന താരം.

മെസ്സിയുടെ നീക്കങ്ങൾ മുൻകൂട്ടി കാണാൻ സാധിക്കാറില്ല എന്ന് പല ഡിഫെൻഡർമാരും പറഞ്ഞിട്ടുണ്ട്. അസാധ്യമായ ആംഗിളില്‍ നിന്നുള്ള പാസുകളും ഗോളും എല്ലാം മെസിയുടെ നീണ്ട കരിയറിൽ പലപ്പോഴും കാണാൻ സാധിക്കും. അത്തരമൊരു ശ്രദ്ധേയ വീഡിയോയാണ് ഇപ്പോള്‍ വൈറലായി മാറിയിരിക്കുന്നത്. മെസിക്ക് തലയുടെ പിന്നില്‍ കണ്ണുണ്ടോ എന്നാണ് വീഡിയോ പങ്കിട്ട് ആരാധകര്‍ ചോദിക്കുന്നത്. കഴിഞ്ഞ ദിവസം പിഎസ്ജി യുടെ പരിശീലനത്തിൽ നടന്ന ഒരു സംഭവമാണ് ആരാധകരോട് ഇങ്ങനെയൊരു ചോദ്യം ചോദിക്കാൻ ഇടയാക്കിയയത്.

ലയണൽ മെസി കൈലിയൻ എംബാപ്പെക്ക് ഗോളടിക്കാൻ കൊടുത്ത പാസിന്റെ വിഡിയോയാണ് ഇപ്പോൾ വൈറൽ ആയിരിക്കുന്നത്. എംബാപ്പെ കൊടുത്ത പാസ്സുമായി എതിരാളികളെ വെട്ടിച്ച് മെസ്സി പന്തുമായി ബോക്സിലേക്ക് മുന്നേറി തിരിച്ചുള്ള പാസിന് ഫ്രഞ്ച് താരം വിളിച്ചപ്പോൾ പിന്നിലേക്ക് ഇടംകാല്‍ കൊണ്ട് കിറുകൃത്യമായി പാസ് നല്‍കിയതാണ് ആരാധകരെ അത്ഭുതപ്പെടുത്തിയത്. അര്ജന്റീന ഇതിഹാസം ഒരിക്കൽ പോലും നോക്കാതെയാണ് എംബാപ്പെയ്ക്ക് പന്ത് തിരികെ നൽകിയത്. എംബപ്പേ എവിടെയാണെന്ന് മെസ്സിക്ക് അറിയാമായിരുന്നു. കൃത്യമായി പാസ് സ്വീകരിച്ച എംബപ്പേ മനോഹരമായി അത് വലയിലാക്കുകയും ചെയ്തു. എംബപ്പേ വന്നു നില്‍ക്കുമെന്ന് മെസി എങ്ങനെ മനസിലാക്കി എന്നതാണ് ആരാധകരെ അത്ഭുതപ്പെടുത്തിയത്.

ക്ലെർമോണ്ട് ഫുട്ട്, മോണ്ട്പെല്ലിയർ എന്നിവയ്ക്കെതിരായ ഉയർന്ന സ്‌കോറിംഗ് വിജയങ്ങൾക്ക് ശേഷം ഈ സീസണിലെ ലീഗ് 1 ലെ അടുത്ത മത്സരത്തിൽ പിഎസ്ജി Lille നേരിടും.ഫ്രാൻസിന്റെ തലസ്ഥാനത്ത് ശാന്തമായ ആദ്യ സീസണിന് ശേഷം ഈ സീസണിൽ വലിയൊരു തിരിച്ചു വരവിനു കൂടി ഒരുങ്ങുകയാണ് ലയണൽ മെസ്സി.