” പിഎസ്ജിയിലെ ഭാവിയെക്കുറിച്ച് തീരുമാനമെടുത്ത് ലയണൽ മെസ്സി “
ചാമ്പ്യൻസ് ലീഗിൽ റയൽ മാഡ്രിഡിനെതിരായ നിരാശാജനകമായ പ്രകടനത്തെ തുടർന്ന് ഏഴ് തവണ ബാലൺ ഡി ഓർ ജേതാവിനെ അടുത്തിടെ പിഎസ്ജി ആരാധകർ പരിഹസിച്ചിരുന്നു. മാർച്ച് 10 ന് നടന്ന 16-ാം റൗണ്ട് പോരാട്ടത്തിന്റെ രണ്ടാം പാദത്തിൽ ലോസ് ബ്ലാങ്കോസിനോട് 3-1 ന് തോറ്റതിനെ തുടർന്ന് പിഎസ്ജി ചാമ്പ്യൻസ് ലീഗിൽ നിന്നും പുറത്തായിരുന്നു. സാന്റിയാഗോ ബെർണബ്യൂവിൽ മെസ്സിക്ക് മികച്ച പ്രകടനം പുറത്തെടുക്കാനായില്ല.
എന്നാൽ സമീപകാല പ്രശ്‌നങ്ങൾക്കിടയിലും 2023 വരെ പാരീസ് സെന്റ് ജെർമെയ്‌നിൽ തുടരാൻ ലയണൽ മെസ്സി തീരുമാനിച്ചതായി മാധ്യമപ്രവർത്തകൻ മാറ്റിയോ മൊറെറ്റോ പറഞ്ഞു.ക്ലബ്ബിലെ പല കാര്യങ്ങളിലും സന്തുഷ്ടനല്ലെങ്കിലും, 2023 വരെ PSG-യിൽ തുടരാൻ മെസ്സി തീരുമാനിച്ചു. 34-കാരനായ ഫോർവേഡ് 2021-ലെ വേനൽക്കാലത്ത് പാരീസിലെ ഭീമൻമാരുമായി രണ്ട് വർഷത്തെ കരാർ ഒപ്പിട്ടിരുന്നു. 2022-23 സീസണിന്റെ അവസാനത്തിൽ ഒരു വർഷം കൂടി കരാർ നീട്ടാനും മെസ്സിക്ക് അവസരമുണ്ട്.ഫ്രഞ്ച് ക്ലബിന് ചാമ്പ്യൻസ് ലീഗ് കിരീടം നേടിക്കൊടുക്കുകയെന്ന ലക്‌ഷ്യം മെസിക്കുമുണ്ടെന്ന് റിപ്പോർട്ടുകൾ വ്യക്തമാക്കുന്നു.
ലയണൽ മെസ്സി കാര്യങ്ങൾ ശരിയാക്കാനും ആരാധകരെ തിരിച്ചുപിടിക്കാൻ പിച്ചിലെ തന്റെ പ്രകടനം മെച്ചപ്പെടുത്താനുമുള്ള തീരുമാനം എടുത്തിരിക്കുകയാണ്.2022 ഫിഫ ലോകകപ്പ് വർഷാവസാനം ഷെഡ്യൂൾ ചെയ്തിരിക്കുന്നതിനാൽ, മെഗാ ഇവന്റിന് മുന്നോടിയായി അര്ജന്റീന സൂപ്പർ താരത്തിന് മികച്ച ഫോമിൽ എത്തേണ്ടതുണ്ട്.കൈലിയൻ എംബാപ്പെ വിടവാങ്ങാൻ തീരുമാനിച്ചാൽ അടുത്ത സീസണിൽ ലയണൽ മെസ്സിക്ക് പിഎസ്ജി കുപ്പായത്തിൽ കൂടുതൽ തിളങ്ങാൻ അവസരം ലഭിക്കും.നിലവിലെ സീസണിന്റെ അവസാനത്തിൽ എംബാപ്പെ പാർക് ഡെസ് പ്രിൻസസ് വിട്ട് റയൽ മാഡ്രിഡിൽ ചേരുമെന്ന് പ്രതീക്ഷിക്കുന്നു.
ഫ്രഞ്ച് തലസ്ഥാനത്തെ തന്റെ പുതിയ ചുറ്റുപാടുകളുമായി പൊരുത്തപ്പെടാൻ ലയണൽ മെസ്സി കരുതിയതിലും സമയമെടുത്തു. 34 കാരനായ ഫോർവേഡ് PSG ക്കായി 26 മത്സരങ്ങളിൽ നിന്ന് ഏഴ് ഗോളുകളും 11 അസിസ്റ്റുകളും നേടിയിട്ടുണ്ട്. എന്നിരുന്നാലും, ഈ സീസണിൽ ഇതുവരെ ലീഗിൽ രണ്ട് തവണ മാത്രമാണ് അദ്ദേഹം സ്കോർ ചെയ്തത്.പുതുവർഷത്തിന്റെ ആദ്യ മാസങ്ങളിൽ ലയണൽ മെസ്സി ഒടുവിൽ പാരീസിൽ തന്റെ താളം കണ്ടെത്തിയതായി തോന്നുന്നു. ജനുവരിയിലും ഫെബ്രുവരിയിലുമായി അഞ്ച് ലീഗ് 1 മത്സരങ്ങളിൽ നിന്ന് ഒരു ഗോളും ആറ് അസിസ്റ്റുകളും ഫോർവേഡ് രേഖപ്പെടുത്തി. എന്നിരുന്നാലും, രണ്ട് ലീഗ് മത്സരങ്ങൾ ഒരു ഗോൾ സംഭാവന കൂടാതെ പോയതിനാൽ വീണ്ടും താരത്തിന് മേൽ വിമർശനം ഉയർന്നു.