‘ഏറ്റവും കൂടുതൽ മത്സരങ്ങൾ മുതൽ കൂടുതൽ വിജയങ്ങൾ വരെ’ : ലോകകപ്പ് ഫൈനലിൽ ലയണൽ മെസ്സി നേടിയ റെക്കോർഡുകൾ |Lionel Messi
ലുസൈൽ ഐക്കണിക് സ്റ്റേഡിയത്തിൽ നടന്ന 2022 ഫിഫ ലോകകപ്പിന്റെ ഫൈനൽ പോരാട്ടത്തിൽ ലയണൽ മെസ്സിയുടെ അർജന്റീന 2018 ജേതാക്കളായ ഫ്രാൻസിനെ പെനാൽറ്റി ഷൂട്ട് ഔട്ടിൽ കീഴടക്കി കിരീടത്തിൽ മുത്തമിട്ടു.60 വർഷത്തിനിടെ കിരീടം നിലനിർത്തുന്ന ആദ്യ ടീമായി മാറാൻ ഫ്രഞ്ച് ടീം ലക്ഷ്യമിട്ടിരുന്നുവെങ്കിലും അവർ അതിൽ വിജയിച്ചില്ല.
90 മിനിറ്റിനും 30 മിനിറ്റ് അധിക സമയത്തിനും ശേഷം മത്സരം 3-3ന് അവസാനിച്ചതിന് ശേഷം പെനാൽറ്റി ഷൂട്ടൗട്ടിൽ ലെസ് ബ്ലൂസിനെ അര്ജന്റീന 2-4 ന് പരാജയപ്പെടുത്തി. ഫൈനലിൽ ഇരട്ട ഗോളുമായി തിളങ്ങിയ മെസ്സി മിന്നുന്ന പ്രകടനമാണ് പുറത്തെടുത്തത്.ഫിഫ ലോകകപ്പിലെ മെസ്സിയുടെ അവസാന മത്സരമായിരുന്നു അത്, ലോകകപ്പ് ജേതാവാകാൻ അദ്ദേഹം തന്റെ എല്ലാ ശ്രമങ്ങളും നൽകി. അദ്ദേഹത്തിന്റെ കഠിന പ്രയത്നം ഇത്തവണ പാഴായില്ല. ഫൈനൽ പോരാട്ടത്തിൽ മെസ്സി നിരവധി റെക്കോർഡുകളാണ് തകർത്തത്.തന്റെ ഫുട്ബോൾ കരിയറിലെ ഏറ്റവും അത്ഭുതകരമായ രാത്രിയിൽ മെസ്സി സൃഷ്ടിച്ച എല്ലാ റെക്കോർഡുകളുടെയും ലിസ്റ്റ് പരിശോധിക്കാം.
ലോകകപ്പിലെ ഏറ്റവും കൂടുതൽ മത്സരങ്ങൾ: ഫൈനലിൽ കളിച്ചതിന് ശേഷം, ഫിഫ ലോകകപ്പ് ചരിത്രത്തിൽ ഏറ്റവും കൂടുതൽ മത്സരങ്ങൾ കളിച്ച താരമായി മെസ്സി മാറി. 25 മത്സരങ്ങൾ കളിച്ച മുൻ ജർമ്മനി താരം ലോതർ മത്തൗസിന്റെ റെക്കോർഡാണ് അദ്ദേഹം തകർത്തത്.
ഏറ്റവും കൂടുതൽ ഫിഫ ലോകകപ്പ് മിനിറ്റുകൾ കളിച്ചത്: ഫൈനലിൽ മുഴുവൻ 120 മിനിറ്റും കളിച്ച്, ഫിഫ ലോകകപ്പ് മിനിറ്റുകൾ കളിച്ച മുൻ ഇറ്റലി ഡിഫൻഡർ പൗലോ മാൽഡിനിയുടെ റെക്കോർഡ് മെസ്സി തകർത്തു. 26 മത്സരങ്ങളിൽ നിന്ന് 2,314+ മിനിറ്റാണ് മെസ്സി മൈതാനത്ത് ചെലവഴിച്ചത്, അതേസമയം മാൽഡിനിയുടെ മാർക്ക് 2,217 ആയിരുന്നു.
ലോകകപ്പിലെ ഏറ്റവും കൂടുതൽ വിജയങ്ങൾ:ഫൈനലിൽ അർജന്റീനയുടെ വിജയം ലോകകപ്പിൽ കളിച്ച 26 മത്സരങ്ങളിൽ മെസ്സിയുടെ 17-ാം വിജയമായിരുന്നു. ജർമ്മനിയുടെ മുൻ സ്‌ട്രൈക്കറായ മിറോസ്ലാവ് ക്ലോസെയുടെ നേട്ടത്തിനൊപ്പമാണ് അദ്ദേഹം ഇപ്പോൾ. ലോകകപ്പ് മത്സരങ്ങളിൽ ഏറ്റവും കൂടുതൽ വിജയിച്ച താരമാണ് ക്ളോസെ .
എല്ലാ നോക്കൗട്ട് മത്സരങ്ങളിലും ഗോൾ നേടുന്ന ആദ്യ കളിക്കാരൻ: ലോകകപ്പിന്റെ ഒരൊറ്റ പതിപ്പിൽ ഗ്രൂപ്പ് സ്റ്റേജ്, റൗണ്ട് ഓഫ് 16, ക്വാർട്ടർ ഫൈനൽ, സെമി ഫൈനൽ, ഫൈനൽ എന്നിവയിൽ ഗോൾ നേടുന്ന ആദ്യ കളിക്കാരനായി മെസ്സി.
ഒന്നിലധികം ഗോൾഡൻ ബോളുകൾ: ഫിഫ ലോകകപ്പ് ചരിത്രത്തിൽ ഒന്നിലധികം ഗോൾഡൻ ബോൾ അവാർഡുകൾ നേടുന്ന ആദ്യ കളിക്കാരനായി മെസ്സി മാറി. 2014 പതിപ്പിൽ തന്റെ ആദ്യ ഗോൾഡൻ ബോൾ നേടി, അർജന്റീനയുടെ വിജയത്തിൽ വലിയ പങ്കുവഹിച്ചതിന് 2022 ൽ രണ്ടാമത്തേത് അദ്ദേഹത്തിന് ലഭിച്ചു.