ഫുട്ബോൾ ചരിത്രത്തിലെ ഏറ്റവും മികച്ച താരമായാണ് അര്ജന്റീന സൂപ്പർ താരം ലയണൽ മെസ്സിയെ കണക്കാക്കുന്നത്.ഏകദേശം രണ്ട് പതിറ്റാണ്ടോളം നീണ്ടുനിന്ന കരിയറിൽ അദ്ദേഹം നിരവധി ഗോളുകൾ നേടുകയും ക്ലബ്ബിനും രാജ്യത്തിനുമായി ധാരാളം കിരീടങ്ങൾ നേടുകയും ചെയ്തു.രണ്ട് കോണ്ടിനെന്റൽ ട്രെബിളുകളും പത്ത് ലാ ലിഗ കിരീടങ്ങളും മറ്റ് എണ്ണമറ്റ ബഹുമതികളും മെസ്സി നേടിയിട്ടുണ്ട്.
7 തവണ ബാലൺ ഡി ഓറും എട്ട് തവണ പിച്ചിച്ചി അവാർഡും നേടിയ 35 കാരൻ കഴിഞ്ഞ വര്ഷം അര്ജന്റീനകൊപ്പം ഖത്തർ വേൾഡ് കപ്പ് ഉയർത്തുകയും ചെയ്തു.പ്രൊഫെഷണൽ ഫുട്ബോളിൽ ആകെ രണ്ടു ക്ലബുകൾക്ക് വേണ്ടി മാത്രമേ കളിച്ചിട്ടുള്ളൂവെങ്കിലും നിരവധി സൂപ്പർതാരങ്ങൾ ലയണൽ മെസിക്കൊപ്പം കളിച്ചിട്ടുണ്ട്. ഗോളിന്റെ റിപ്പോർട്ടുകൾ പ്രകാരം കഴിഞ്ഞ ദിവസം താൻ ഒപ്പം കളിച്ച താരങ്ങളെ വെച്ച് ഏറ്റവും മികച്ച ഇലവൻ ലയണൽ മെസി തിരഞ്ഞെടുത്തിരുന്നു.
ബാഴ്‌സലോണ താരങ്ങളുടെ ആധിപത്യമുള്ള ഇലവനിൽ ഒരൊറ്റ താരം മാത്രമാണ് പിഎസ്‌ജിയിൽ നിന്നുമുള്ളത്. ഫ്രഞ്ച് താരം കിലിയൻ എംബാപ്പയാണ് മെസി തിരഞ്ഞെടുത്ത ബാഴ്‌സയിൽ ഒപ്പം കളിക്കാത്ത ഒരേയൊരു താരം.ഗോൾകീപ്പറായി നിലവിൽ ബാഴ്‌സലോണയിൽ ഉജ്ജ്വല ഫോമിൽ കളിക്കുന്ന ടെർ സ്റ്റീഗനെ തന്നെയാണ് മെസി തിരഞ്ഞെടുത്തത്. പ്രതിരോധനിരയിൽ സെന്റർ ബാക്കുകളായി മഷറാനോ, പുയോൾ എന്നിവരെ ഉൾപ്പെടുത്തിയപ്പോൾ പിക്വയേ തഴഞ്ഞിട്ടുണ്ട്. റൈറ്റ് ബാക്കായി ബ്രസീലിയൻ താരം ഡാനി അൽവസും ലെഫ്റ്റ് ബാക്കായി ജോർദി ആൽബയുമാണ് ഇടം പിടിച്ചിരിക്കുന്നത്.മധ്യനിര പ്രതിഭാസമ്പന്നമാണ്.
Lionel Messi picks the Best XI he has played with in his career. 💥 pic.twitter.com/44pNxKvFiM
— BeksFCB (@Joshua_Ubeku) April 17, 2023
ഒരിക്കലും ഒഴിവാക്കില്ലെന്നുറപ്പുള്ള സാവി, ഇനിയേസ്റ്റ എന്നിവർക്കൊപ്പം ബ്രസീലിയൻ താരം റൊണാൾഡീന്യോയാണ് മധ്യനിരയിലുള്ളത്. മുന്നേറ്റനിരയിൽ മെസിയുടെ അടുത്ത സുഹൃത്തുക്കളും മുൻ ബാഴ്‌സലോണ താരങ്ങളുമായി നെയ്‌മർ, സുവാരസ് എന്നിവരുള്ളപ്പോൾ അതിനൊപ്പമാണ് എംബാപ്പെയെ മെസി ചേർത്ത് വെച്ചിരിക്കുന്നത്.ലയണൽ മെസിയും എംബാപ്പെയും തമ്മിൽ അസ്വാരസ്യങ്ങൾ ഉണ്ടെന്നാണ് ആരാധകർ കരുതുന്നതെങ്കിലും അതില്ലെന്നാണ് താരത്തിന്റെ ഈ തിരഞ്ഞെടുപ്പ് വ്യക്തമാക്കുന്നത്. ബാഴ്‌സലോണയും അവിടെ കളിച്ച താരങ്ങളും മെസിക്ക് എത്ര പ്രധാനപ്പെട്ടതാണെന്നും ഇത് തെളിയിക്കുന്നു. ഈ സീസണ് ശേഷം മെസി ബാഴ്‌സയിലേക്ക് തിരിച്ചു പോകാനാണ് സാധ്യത.