ലക്ഷ്യം കിരീടം : ലോകകപ്പിനുള്ള ബ്രസീൽ ടീം ഖത്തറിലെത്തി |Qatar 2022 |Brazil

അഞ്ച് തവണ ലോകകപ്പ് ജേതാക്കളായ ബ്രസീൽ 2022 ലോകകപ്പിനായി ഖത്തറിലെത്തി. ലോകകപ്പിനായി ഖത്തറിൽ എത്തുന്ന 32-ാം ടീമായാണ് ബ്രസീൽ ദോഹയിൽ ഇറങ്ങിയത്. ലോകകപ്പിനുള്ള 31 ടീമുകളും ഖത്തറിലെത്തിക്കഴിഞ്ഞു. ഇറ്റലിയിൽ പരിശീലനം നടത്തുന്ന ബ്രസീൽ ടീം ഇന്ന് ഖത്തറിലെത്തി. 2022 ലോകകപ്പിലെ പ്രിയപ്പെട്ട ടീമുകളിലൊന്നാണ് ബ്രസീൽ, ഫിഫ റാങ്കിംഗിലും അവർ തന്നെയാണ് ഒന്നാം സ്ഥാനത്ത്.

നിലവിൽ ബ്രസീലിന്റെ 26 അംഗ ടീമിൽ ആർക്കും പരിക്കില്ല എന്നത് ബ്രസീൽ ടീമിന് ആത്മവിശ്വാസം നൽകുന്നു. പരിശീലകൻ ടിറ്റെയുടെ പദ്ധതികൾ വിജയിക്കുകയും കളിക്കാർ മികച്ച പ്രകടനം നടത്തുകയും ചെയ്താൽ ബ്രസീലിന് ഇത്തവണ ആറാം ലോകകപ്പ് ഉറപ്പായും. കഴിഞ്ഞ വർഷങ്ങളിൽ ബ്രസീൽ മികച്ച പ്രകടനമാണ് നടത്തുന്നത്. പരിചയ സമ്പന്നരും യുവതാരങ്ങളും അടങ്ങുന്ന ബ്രസീൽ സ്ക്വാഡിലെ ഭൂരിഭാഗം പേരും ഈ സീസണിൽ മികച്ച ഫോമിലാണെന്നതും ബ്രസീൽ ടീമിന് വലിയ പ്രതീക്ഷയാണ് നൽകുന്നത്.

പാരീസ് സെന്റ് ജർമൻ സൂപ്പർ താരം നെയ്മർ നയിക്കുന്ന മുന്നേറ്റനിരയാണ് ബ്രസീലിയൻ ടീമിന്റെ ഏറ്റവും വലിയ കരുത്ത്. ചെൽസിയുടെ വെറ്ററൻ സെന്റർ ബാക്ക് തിയാഗോ സിൽവ നയിക്കുന്ന പ്രതിരോധ നിരയും മാഞ്ചസ്റ്റർ യുണൈറ്റഡ് മിഡ്ഫീൽഡർ കാസെമിറോയുടെ മധ്യനിരയും മികച്ചതാണ്. പ്രീമിയർ ലീഗിലെ രണ്ട് പ്രമുഖ ക്ലബ്ബുകളുടെ ഒന്നാം നമ്പർ ഗോൾകീപ്പർമാരായ അലിസൺ ബെക്കറും എഡേഴ്സണുമാണ് ബ്രസീലിന്റെ വല കാക്കുന്നത് .

സെർബിയ, സ്വിറ്റ്‌സർലൻഡ്, കാമറൂൺ എന്നിവർക്കൊപ്പം ഗ്രൂപ്പ് ജിയിലാണ് ബ്രസീൽ. നിലവിലെ ഫോമിന്റെ അടിസ്ഥാനത്തിൽ ഗ്രൂപ്പ് ജേതാക്കളായി ബ്രസീൽ 16-ാം റൗണ്ടിൽ പ്രവേശിക്കുമെന്ന് പ്രതീക്ഷിക്കുന്നു. നവംബർ 25 ന് സെർബിയക്കെതിരെയാണ് ബ്രസീലിന്റെ ആദ്യ ലോകകപ്പ് മത്സരം. നവംബർ 28 ന് സ്വിറ്റ്സർലൻഡിനെയും ഡിസംബർ 3 ന് കാമറൂണിനെയും ബ്രസീൽ നേരിടും. ബ്രസീലിന്റെ ആദ്യ പരിശീലന സെഷൻ ഞായറാഴ്ച വൈകുന്നേരം അൽ അറബി സ്റ്റേഡിയത്തിൽ നടക്കും.

റഷ്യയിൽ നടന്ന 2018 പതിപ്പിൽ ക്വാർട്ടർ ഫൈനലിൽ ബെൽജിയത്തോട് തോറ്റ ബ്രസീൽ 2022 ൽ വമ്പൻ തിരിച്ചിവരവാണ്‌ ലക്ഷ്യമിടുന്നത്.20 വർഷം മുമ്പ് റൊണാൾഡോ, റിവാൾഡോ, റൊണാൾഡീഞ്ഞോ എന്നിവരുടെ അറ്റാക്കിങ് ത്രിമൂർത്തികളുടെ പ്രകടനത്തിന്റെ പിൻബലത്തിലാണ് ബ്രസീൽ അവസാന ലോകകപ്പ് വിജയം സ്വന്തമാക്കിയത്.ലോകത്തെ ഏറ്റവും വിലപിടിപ്പുള്ള കളിക്കാരനായ പാരീസ് സെന്റ് ജെർമെയ്ൻ ഫോർവേഡ് നെയ്മറിന്റെ മിന്നുന്ന ഫോമിലാണ് ബ്രസീലിന്റെ പ്രതീക്ഷകൾ.

മൂന്നാം ലോകകപ്പിനായി തയായറെടുക്കുന്ന മുപ്പതുകാരൻ ലിഗ് വണ്ണിലും ചാമ്പ്യൻസ് ലീഗിലുമായി 19 മത്സരങ്ങളിൽ നിന്ന് 11 അസിസ്റ്റുകളോടെ 13 ഗോളുകൾ നേടിയിട്ടുണ്ട്.2021-ൽ റിയോ ഡി ജനീറോയിലെ മാരക്കാന സ്റ്റേഡിയത്തിൽ നടന്ന കോപ്പ അമേരിക്ക ഫൈനലിൽ ലയണൽ മെസ്സിയുടെ അർജന്റീനയ്‌ക്കെതിരെയാണ് അവസാന 15 കളികളിൽ ബ്രസീൽ അവസാനമായി പരാജയപ്പെട്ടത്